आमच्या विषयी

                                    अध्यक्षांचे मनोगत   

सन्माननीय सभासद बंधू आणि भगिनीनो,

  आपणा सर्वाना नमस्कार.

             ३१ मार्च २०२५ रोजी संपलेल्या आर्थिक वर्षाचा ताळेबंद, नफा-तोटा पत्रक आपणासमोर सादर करताना आम्हाला कर्तव्यपूर्तीचे समाधान वाटते, आपल्या जडणघडणीत ज्यांचा मोलाचा सहभाग आहे, असे संस्थेचे संस्थापक एम.एस.गायकर साहेब आणि त्यांना मनापासून साथ देणारे माजी अध्यक्ष कै.रमाकांत शेळके मास्तर, कै.गोंविंदराव महाले मास्तर ,कै.नामदेव बोडके मास्तर, कै.एस.जी.हुलवळे साहेब ,सिताराम हांडे साहेब ,कै.जिजाभाऊ मते साहेब ,भाऊ र.आरोटे साहेब ,बाबुराव गायकर साहेब ,अशोकराव वाळूंज साहेब ,डॉ. संकेतराव हुलवळे साहेब या सर्वांबरोबर सर्व उपाध्यक्ष ,आजी-माजी संचालक यांचा ऋणनिर्देश करून यशोमंदीर परिवार भविष्याची वाटचाल करीत आहे.

           आपल्या संस्थेचे ३१ मार्च २०२५ अखेरचे सांपत्तीक  स्थितीचे अवलोकन केले असता संस्थेच्या ठेवी रु.३१६.९८ कोटी व कर्ज रु.२४५.५८ कोटी असा एकूण रु. ५६२.५६ कोटीचा संमिश्र व्यवसाय असून संस्थेला रु.९.६२ कोटीचा ढोबळ नफा झालेला आहे, खेळत्या भांडवलाशी त्याचे प्रमाण २.२३%आहे. मा.सहकार आयुक्त व निंबधक,सहकारी संस्था ,महाराष्ट्र राज्य ,पुणे यांचे पत्र दि.०५/०२/२०२४ नुसार एन.पी.ए.च्या तरतुदींमध्ये वाढ केल्यामुळे या बदलाचा परिणाम संस्थेच्या निव्वळ नफ्यावर झालेला आहे.यांचा गांभीर्याने विचार करून या आर्थिक वर्षात वसुलीच्या कामांना प्राधान्य देऊन संस्थेचा ढोबळ एन.पी.ए. १०.००% पेक्षा कमी व निव्वळ एन.पी.ए. ५.००% पेक्षा कमी  आणण्याचा संचालक मंडळाने निर्धार केलेला आहे.

         नियामक मंडळाने निर्धारित केल्यानुसार संस्थेने दैनदिन पद्धतीने वैधानिक तरलता निधी प्रमाण व रोख राखीव निधी प्रमाण राखून पालन केले आहे. तसेच नियामक मंडळाने सन २०२२-२३ या आर्थिक वर्षापासून CRAR चे प्रमाण ९.००% प्रमाणे लागू केले असून आपल्या संस्थेचे CRAR चे प्रमाण १९.५३% इतके आहे. भाग भांडवलात १०% पेक्षा जास्त वाढ करण्याचा संचालक मंडळाने निर्धार केला आहे.

आपल्या देशातील अर्थकारणाचे मागील ४ ते ५ वर्षात आर्थिक स्थितीचे अवलोकन केले असता रोख रकमांचे व्यवहार नियत्रित होऊन कॅशलेस अर्थव्यवस्थेकडे वाटचाल करण्याचे धोरण रिझर्व्ह बँक ऑफ इंडिया व केंद्र शासन करित आहे. या धोरणांना अनुसरून पुढील काळात संस्थेच्या व्यवसाय वाढीच्या दृष्टीने संस्थेतील सभासदांना डिजिटल बँकिग सुविधा देणे क्रमप्राप्त आहे. त्याकरिता सक्षम EDP विभाग निर्माण करण्याचा संचालक मंडळाचा मानस आहे.

          संस्थेच्या ४७ व्या वर्षाच्या वाटचालीत सर्व जुने सहकारी ,नवनिर्वाचित संचालक ,तसेच संस्थेचे सर्व सभासद ,ठेवीदार ,ठेवप्रतिनिधी ,हिंतचिंतक ,संस्थेचे अधिकारी व कर्मचारी या सर्वांच्या सहकार्याने संस्था येत्या वर्षभरात ६०० कोटींचा संमिश्र व्यवसायाचा टप्पा पार करील असा मला विश्वास आहे.

             या आर्थिक वर्षात संस्थेच्या प्रवर्तक मंडळातील सदस्य कै.ठकसेन बाबुराव गायकर,माजी उपाध्यक्ष कै.गणपत कोंडाजी गायकर व संचालिका कै.हेमलता एकनाथ वाझे  यांचे दु:खद निधन झाले ,त्याचप्रमाणे ब्राम्हणवाडा गावचे सुपुत्र वीर जवान स्व. संदीप गायकर यांनी आपल्या देशासाठी बलिदान दिले ,त्यांना सर्व सभासद ,कर्मचारी वृंद ,संचालक मंडळाचे वतीने भावपूर्ण श्रद्धांजली अर्पण करतो.

           नुकत्याच पार पडलेल्या संस्थेच्या संचालक मंडळाच्या निवडणुकीत आपण सर्वांनी आम्हाला सेवेची संधी दिली ,त्याबद्दल सर्व नवनिर्वाचित संचालकांच्या वतीने आपणास मनपूर्वक धन्यवाद देतो. आपल्या विश्वासाला पात्र ठरण्यासाठी प्रयत्नाची शिकस्त करू ,आपल्या संस्थेत निवडणूक संपल्यानंतर यशोमंदीर एक परिवार या भूमिकेतून काम करण्याची परंपरा पुढेही जतन करू  असा विश्वास व्यक्त करतो.धन्यवाद|

                              जय हिंद !   जय महाराष्ट्र !!       जय सहकार !!!

                                                                                                                              आपला सहकारी

                                                                                                                                     सही/-

                                                                                                                          श्री.भानुदास शं. आरोटे

                                                                                                                                अध्यक्ष

                                                                                                                 यशोमंदीर सहकारी पतपेढी मर्यादित

            संचालक मंडळाच्या वतीने